Таво «Райда» конкурсӧ пырӧдчис 10 ныв Кулӧмдін, Мылдін, Удора, Сыктывдін, Кӧрткерӧс, Койгорт районъясысь да Сыктывкар, Сосногорск, Ухта, Салехард каръясысь. Кык лун найӧ петкӧдчисны Ёртасян керкаын, кык лун на пиысь корсисны медся шань, медмича да медмуса коми нылӧс.

Фото Сергея Паршукова

Медводдза «Райда» конкурсын вермысь Яна Васильченкова видео пыр шыӧдчис нывъяс дінӧ:

- 2006 воын 16 арӧса нывкаӧн ме пырӧдчи «Райда» конкурсӧ. Ӧні ола Москваын, но ас кыв, ас чужанін ог вунӧд, мый тіянлы тшӧтш сиа.

РФ-са Федерация Сӧветӧ пырысь Валерий Марков, коді тшӧтш вӧлі жюриын, воис ӧти кывйӧ Янакӧд:

- Тані коми нывъяс вермасьӧны оз ортсы, а пытшкӧсса мичлуннас. Найӧ тодӧны чужан кыв да радейтӧны чужан му. Тайӧн «Райда» торъялӧ мукӧд конкурсысь.

Тӧрыт нывъяслӧн вӧлі ордйысян лун. Найӧ петкӧдлісны ассьыныс енбиалунсӧ, вочавидзисны стрӧг жюрилӧн юалӧмъяс вылӧ.

Талун гала-концертын нывъяс водзӧ гартісны важ да выль олӧм: коді бӧрдӧдчис, кодкӧ серӧдiс, а кодкӧ рэпӧн сьыліс «Бур батькӧд-мамкӧд олӧм». Но медводз найӧ ветлӧдлісны карнанӧн. Воысь-во татшӧм мог сувтӧдӧны нывъяс водзын конкурс котыртысьяс. Кокъяс да сарапанъяс эз гартчыны, юръяс эз усьны. Сӧмын нюммунісны, быттьӧ быд лун ва новлӧны тадзи, кӧть эськӧ мукӧдыслы тайӧ лоис медводдзаысь.

Быд нывлӧн вӧлі отсасьысь котыр. Кодӧскӧ чукӧртісны клубын уджалысьяс, кодӧскӧ – ёртъяс да рӧдвуж, а Сыктывкарысь коми кыв велӧдысь Юлия Сычеваӧс дасьтісны конкурс вылӧ сылӧн велӧдчысьяс.

«Торъя жырйын» жюри вӧчис кывкӧртӧд. Ӧтуввез бӧрйысьӧмын вермис Удора районысь Анна Махотина.

Коймӧд места да «Пӧлӧзнича» ним босьтіс Кӧрткерӧс районысь Анастасия Казакова. Мӧдӧд места да «Катшасин» ним сетісны Ухта карысь Юлия Каневалы.

«Мича Райдаӧн» лоис Кулӧмдін районысь Анастасия Третьякова.

Конкурс котыртіс «Коми войтыр» ӧтмунӧм Коми Республикаса национальнӧй политика министерство отсӧгӧн. Кыдзи пасйис министр Галина Габушева, «Райда» коми нывъяс костын вермасьӧм - радейтана да тӧдчана коми проектъясысь ӧти:

- Сылӧн эм аслыспӧлӧслун. Конкурс сюрӧсас - ас вужъяс, чужан кыв да культура пыдди пуктӧм, асьтӧ вылӧ донъялӧм да ӧта-мӧдӧс вежавидзӧм. Ставыс тайӧ вуджӧ пӧль-пӧчсянь да топыда йитӧ важ да ӧнія олӧмсӧ, сетӧ позянлун зумыда сулавны ас му вылын. «Райда» нуӧдӧны дас воысь дыр нин. Тайӧ петкӧдлӧ, мый пырӧдчыны татчӧ вермӧны повтӧм, авъя да енбиа нывъяс, кодъяс пыдди пуктӧмӧн юксьӧны коми оласног йылысь тӧдӧмлунъясӧн. Тӧда, мый коми вужйыс тайӧ нывъяс вылын оз ор, найӧ и асланыс ныв-пи сьӧлӧмъясӧ чужтасны-пестасны ас кыв да чужан му дорӧ муслун. Ӧд тайӧ и эм «Райда» конкурслӧн медыджыд шедӧдӧмыс.